Osservatorio Sociale
RICUARDI DU SPUNTUNIQuannu ugne tantu passu ‘ntrù paise Me fiermu a ru Spuntune a m’assettare Me vannu l’uacchi a chire corde stise Chijne de panni ‘mpusi ad asciuttare.
Me ricordanu tiempi assai lontani I tiempi belli della gioventù Me tornanu alla mente i paisani Ca su partiti e un se sa a dde su ?
Mentre me ripusavu a ra scaletta Sientu na vuce cara e canusciuta È veru, sta chiamannu Marietta Ca dintra la cucina sta seduta.
Me azu, ed iu tranquillu m’avvicinu Me fa capire cu ‘nse po azare Chi c’è vò fare e atroce lu distinu Supra ‘na seggia ferma s’ha de stare.
Quantu ricordi tornanu alla mente Piensu quannu pur’iu era guaglione jucava ‘ntru paise cumu nente Ccu Brunu e Nataluzzu a su Spuntune.
Na vota ca la mente è spalancata Ormai ‘nu la ferma cchù nessunu È cumu si cc’è fossi ‘na sfilata De tutti chiri amici ad unu ad unu.
Me passadi davanti Carminuzzu Seguito de Pinuzzu de Ligginu Pu arriva Politieddru ccu Genuzzu Dante Gianotta e puru Celestinu.
Me vannu l’uacchi dintra la cantina E sientu ‘na ciroma cu vve dicu U’ vinu è statu sempre ‘na ruvina !! Nonostante sia de stampu anticu.
Sientu ‘na botta supra ‘u tavulinu Ca n’atru pocu me facìa sc-cantare Era ‘nu signu ppè purtare ‘u vinu E ad Alfredu ppe se manìare
Escia da porta ‘Ntoni Grisulia, s’assetta l’ha davanti a chiru siettu se fa ‘nu discursieddru, pizzulia, e ugne tantu se gratta lu cuzziettu
Pu sienti de luntanu ‘na gridata è Romeu a quannu a quannu chi camina Tena ‘na quadareddra e vò stagnata Ma prima ha de passare da cantina.
Convintu ca ‘nu ‘nc’era cchiù nessunu Viu n’umbra ca me vò avvicinare L’haiu canusciutu ! è Totonnu ‘e Brunu Ca me fa signu ca me vò parrare
Totonnu è statu sempre comunista La cruce cu ogni mezzu ha combattutu Se canuscìa all’istante, a prima vista Ch’era ‘nu Leninista risaputu
Mentre ‘ntra mente macina su rullu Scinna ‘nu motorinu chianu chianu ‘un po’ sbagliare, è Liveri Ciardullo ca se sta ricugliannu ‘e Dipignanu
Ce fossi ancora troppu de cuntare Ma mu risparmio ormai ppe n’atra vota Sapiti, è bellu e bruttu ricordare Te sienti ‘a capu ca te nescia ciota.
Nessunu po’ fermare ‘a nostalgia È na cosa ca parta de ‘ntru ‘u core Quannu te piglia è cchiù e ‘na malatia Ca poco a poco iddra te fa more.
Renato Provenzano, Laurignano 30 Aprile 2010 |
|
| ”u spuntuni con l’imbocco ‘da Judeca. | |
|
”a scala: seduti Paolino Orangis, Pasquale Spizzirri, Mimmo Gaudio |
|
|
|
|
|
”a casa e ‘Ntoni Grisulia, a cantina e Rangiu, l’imbocco da Cavaredda |
|
|
|
|
| ”a Cavaredda, a casa ‘e Valentini | |
|
.”a casa e Ronzu e de Totonno e Brunu |
Santu Liveri, a casa e Genuzzu Prete e Miliu Addolorata
